Banksjefen: – Det er mykje å spare på å vere ein matreddar

Jan Petter Vadheim trur ein kan spare 20-30.000 kroner kvart år på planlegge matinnkjøpa betre.

– Eg snakka med sonen min om kva familien deira brukte kvar månad på mat. Dei vart litt overraska over summen og fann ut at dei ville planlegge innkjøpa betre. Dei starta å handle ein gong i veka, med litt supplering undervegs, og dei reduserte matutgiftene med fleire tusen kroner, fortel Jan Petter Vadheim i Sparebanken Sogn og Fjordane.

Han er banksjef for bedriftsmarknaden i Indre Sogn, og er oppteken av tal og budsjett – også for privat hushald.

– Eg har konkludert med at det viktigaste er å planlegge matinnkjøpa. Har ein oversikt over kva ein har i kjøpeskap og frys, kan ein spare ein del matutgifter kvar månad.

Tenk økonomisk – kast mindre mat

I følgje SIFO sitt referansebudsjett for forbruksutgifter i 2020 brukar ein familie på fire over 11.000 kroner på mat og drikke kvar månad. Det utgjer over 130.000 kroner i året.

– Dette er tall me budsjetterer med i banken. Referansebudsjettet er regna for å vere eit forbruk som kan bli godteke av folk flest. Så eg trur disse talla er noko alle vil kjenne seg igjen i.

– Det ein derimot kan undre seg over, er at ca. kvar fjerde berepose med mat vert kasta. Og at halvparten av all mat som vert kasta i Sogn er etbar og ikkje burde vore kasta, fortel Vadheim.

Han trur ein kan spare mellom 20-30.000 kroner på å vere meir bevisst på å planlegge innkjøp og halde oversikt over kva ein har i kjøleskapet. Er ein meir økonomisk, vil ein òg fort kaste mindre mat.  

– Når ein står i butikken og velje kva ein skal ha til middag, så hugsar ein gjerne ikkje kva som er i kjøleskapet heime. Og for å unngå å måtte ned igjen i butikken, så tar ein med alle ingrediensar for å vere sikker. Så då ender ein opp med for mykje mat og må fort kasta.  

Bytte ut fryseboks

I tillegg til å planlegge innkjøpa, har Vadheim bytt ut fryseboksen med eit fryseskap, og har fått betre oversikt over kva som er i frysen.

– Det som ligg i botn av ein fryseboks har ein tendens til å bli liggande, men i fryseskapet har eg god oversikt. Feit fisk skal til dømes ikkje ligge for lenge i frysaren, så da gjeld det å ha oversikt, fortel Vadheim, og legg til:

– Me er kanskje ikkje dei flinkaste matreddarane heime hjå oss, men eg trur at den planlegginga me gjer med matinnkjøp og det at me prøver å halde oversikt over kva me har i kjøleskapet, reduserer matsvinn og gir oss lågare matutgiftar.