Jøril og Hallvard vart heidra for innsatsen i SIMAS

Styreleiar og administrerande direktør er takka av, medan Torunn Hønsi er valt inn som ny styreleiar.

I representantskapsmøtet fredag 22. april, vart styreleiar Jøril Hovland og administrerande direktør Hallvard Thomassen takka for innsatsen dei har lagt ned i SIMAS over lang tid.

Jøril har vore med sidan starten av MAIS-prosjektet, som var oppstarten til SIMAS. Jøril var varamedlem i styret frå 2004 og medlem i styret frå 2007. Ho vart styreleiar i 2009. 

– Jøril og Hallvard har vore eit godt tospann, som begge har vore veldig engasjert i utviklinga av SIMAS og har i lag jobba mot same mål: Å utvikle SIMAS til å vera ein viktig miljøaktør og ein god arbeidsplass i Sogn. Dei har klart å få fokus på at avfall er ein ressurs og har jobba kontinuerleg for å finne løysingar på korleis ein skal utnytte denne ressursen best mogleg, fortel Aud Jane Beheim i SIMAS.

Eit renovasjonsselskap som blir lagt merke til

Hallvard vart tilsett som administrerande direktør 1. mai 2010. Sidan då har det vore ei rivande utvikling i SIMAS. Hallvard er framoverlent og har bygd opp SIMAS til å bli eit renovasjonsselskap som blir lagt merke til på vestlandet, som andre ynskjer å samarbeide med og som blir spurt om råd. 

– Han har klart det han lova i 2010 – at det skulle bli eit sjekketriks å seie at ein jobbar i SIMAS. 

Det har vorte investert 135 millionar i den perioden han har vore direktør. Det har vore gjort store endringar i området i Festingdalen, korleis ein driftar selskapet, og korleis ein føl opp krav og retningslinjer frå myndigheitene. Det har vore ei stor utvikling i heile organisasjonen, slik at mange arbeidsoppgåver i dag er meir digitale, fortel Beheim.

Antal tilsette tredobla

Antal tilsette har vorte tredobla i den perioden han har leia selskapet og arbeidsplassen har vorte utvikla frå å vera ein arbeidsplass for ufaglærte til å bli ei god blanding av ufaglærte, faglærte og høgskuleutdanna. 

Tilsette har vorte involvert i utviklinga av selskapet, frå årlege strategisamlingar, til å få utvikle seg og vekse som medarbeidarar i selskapet. 

– Hallvard har alltid mange ballar i lufta, til glede og frustrasjon for dei som er rundt han, avsluttar Beheim muntert.

Ny styreleiar frå Vestlandsforskning

Ny styreleiar i SIMAS er Torunn Hønsi. Hønsi jobbar som seniorforskar på Vestlandsforskning og har bakgrunn frå miljø- og avfallsforvaltninga. Ho er utdanna med doktorgrad innan toksikologi, og vore engasjert i lokalpolitikken i Luster. Me er glad for å ha Hønsi med på laget.

Dagny Ugulsvik Alvik er konstituert som ny administrerande direktør/dagleg leiar i eitt år frå mai 2022.

Torunn Hansi og Dagny Ugulsvik Alvik saman i forbindelse eit biokolprosjekt SIMAS og Vestlandsforskning har samarbeida om.