No får du kjøpt SIMASkompost ferdig pakka
Teamleiar Kjetil Nyland Fardal og student Sofie Aaberge Dale ved Luster Arbeids- og treningssenter (ATS) i Gaupne.
Takka vere ATS i Gaupne, kan me no tilby ferdigpakka kompost på alle miljøstasjonane våre.
Tidlegare har me i SIMAS lagt til rette for at kundane spar med seg kompost sjølv, alt etter om ein ønskjer å fylle posar, bøtter, tilhengar, eller tilsvarande.
I år har me fått god hjelp av ATS i Gaupne til å pakke kompostjord ferdig i posar, slik at du berre kan ta med deg ein pose med kompost på vegen, til 50 kroner stykke.
Ynskjer du kompostmiks eller parkkompost, har me dette i Festingdalen.
Kvifor kompost?
Kompost er eit godt jordforbedringsmiddel som tilfører jorda struktur og mikroliv. Kompost inneheld mikroorganismar som bidrege til ein sunn jordkvalitet. Dette kan vere med å forhindre sjukdomsutbrot på plantane og gje betre vekstvilkår.
Fordelar:
Tørkesterk jord: Sand og jordtypar med lite humus er svært kompakt og tørkar fort ut. Ved å tilføre organisk stoff i form av kompost, held jorda betre på fuktigheita og du får mindre tørkeskader.
Sunt jordliv: Kompost inneheld milliardar av sunne mikroorganismar som bidreg til næringsomsetning og reduserer førekomsten av sjukdomsframkallande bakteriar og sopp.
Stabile skråningar: I jordskråningar av sand, silt og leirholdig jord oppstår ofte problem med utvasking og utgliding. Ved å blande inn kompost bindast jorda betre saman, og det etablerast raskare plantevekst.
Næring: I tillegg til å bidra med hovudnæringsstoffa nitrogen, fosfor og kalium, inneheld komposten alle sporstoff som plantane treng. Næringsstoffa blir frigjort gradvis over tid gjennom heile vekstsesongen.
